November 16 ah Gangaw peng Htilin pawng hrawng ah CDF Mindat le YDF pawl ibawm in ralhrang he an kap hna. Hi lio ah CDF le YDF a thimi an um lo. Nain, ralhrang tih ruang ah ramtang a zammi minung 2 cu zohchia taktak in ralhrang nih an thah hna tiah YDF nih cun cathanh an chuah.

November 17 a hung si than, mi sawhsawh cu zohchia tuk in an thah hna caah CDF le YDF cun an thin a hung tuk ii fak ngaingai in ralhrang he cun an i pak than. Hi lio ah CDF Mindat lei in minung pakhat nih ram le miphun caah nunnak a pek. YFD lei in minung 13 nih ram le miphun caah nunnak an pek tiah YDF nih cathanh a chuah.

November 17 thiamthiam ah cun mi sawhsawh, ralhrang tih ruang ah ramtang a zammi minung cu zoh chiah tuk in ralhrang nih minung 3 an thah than tiah an chim. Cu caah CDF Mindat le YDF pawl cu an thin a hung tuk hringhran i November 18 le 19 hi kahdohnak fak taktak in a chuah than tiah kan theih. Nain, November 18 le 19 kahdohnak thawngpang cu an mah CDF le YDF lei in thawngthanh mi a um rih lo.

November 19 hi Htilin pawngkam hrawng ah cun kahdohnak fak tuk in a chuah caah ralhrang nih cunglei raldohnak hriamnam an hman cang tiah kan theih.

November 16 le 17 kahdohnak ah CDF le YDF lawng a thimi an um lo ii ralhrang lei zong minung 10 an thi. Hliamhma fak a tuarmi an tam tiah YDF nih cun cathanh an chuah hi a si.

November 18 le 19 kahdohnak ah hin ralhrang tampi an thi lai tiah zumh a si. Ralhrang 9 hrawng cu an thi cang tiah an chim nain hinak tam deuh an thih lai tiah minung pakhat nih cun a chim.