By CungthaPa Aruang: Kan Lungthu Le Kan Ramkhel

Kan lungthu le kan ramkhel

Kannih hi nu khat chung chuak unau pa 3 kan si. Kan ngakchiat lio te in ka nu nih ba khaih in a rak kan khaih tawnmi bia a um:

“Unau 3 te lawng nan si. Lai lungthu bantuk nan si. Pa khat te a bau sual ah cun rawl chuan khawh a si ti lo. Vawlei cung phung cun na pa he hin kan in thih taak hmasa te hna lai. Kan in thih taak hna hnu zong ah Lai lungthu bantuk tein nan rak i dirkamh zungzal lai.”

Ka nu bia kha Chin mi phun ramkhel puarzar cung ah khin thinlung mitthlam in ka hei benh.

Chin mi hi Kawl ram ah cun milu a tlawmbik miphun ah kan i tel ve. Lai lungthu bantuk in pa khat khat bau awk a ṭhami kan si lo. Falam le Tidim bau awk an ṭhat lo bantuk in Mindat le Paletwah bau awk a ṭhami kan si lo (khua min vialte chim ah cun a sau sual lai).

Cu ve bantuk cun Senthang zong bau awk an ṭhat lo bantuk in Mara le Zophei zong bau awk a ṭha hleimi kan si lo.

Lai lungthu pathum lak ah khin a hak deuh le a nem deuh, a nak deuh le a a var deuh cu an um men ko lai nain pakhat hmanh bau awk an ṭha lo.

Ka u le ka nau he khin biaknak le ramkhel kong ah kan dirpimi minung le party an i khah lo bantuk in kan ruahnak zong an i dang cio. A caan ah cun bia kan i al ko hna. Asinain, ramkhel le biaknak kong dirpimi le uarning aa dan ruang ah kan i hua lo.

Ka nau le ka u khi harnak zeimaw tong sual hna seh law zuan hnawh lo in ka um hrim hrim hna lai lo. Cu ve bantuk cun, harnak tong sual ve ning law ka u le ka nau nih zuan hnawh lo in an ka um ve hrim hrim lai lo.

A za maw ei tiah cun Chin ram hi Burma ram chung in aa pheo kho le a bau kho kan si. A ruang cu, 1947 kum i hnatlaknak kut rak nammi Panglong Hnatlaknak ruang lawng ah Burma ram i aa telmi kan si ti cu kan mifim hna nih an kan chimhmi a si.

Asinain, Chin ram chung i a ummi phun hna hi kan holh aa khah lo hmanh ah kan nunphung aa dang tuk lo. A tu i ram dang timi le miphun dang timi hna nak cun unau ka si deuh ko lo maw? Pakhat hmanh, a ho hmanh a bau kho kan si lo.

A hlei in, a tu lio sa lak le ral lak ah hin pakhat khat kan tlin lo sualah cun kan lungthu a bau lai i rawl kan chum kho lai lo.

Biaknak le ramkhel kongkau ah ruahnak i khah lo hi a sual lo, ruahnak i khah lo ruang ah lungthu pakhat khat bau i rawl chumh khawh lo tu hi a sual hnga.

Ruru hranghrang uknak kan duh cio lo, kan khua kan ram hawi tluk ve seh ti kan duh cio bantuk in kan fa kan naule hi hawi hnu ah i thlai hna hlah seh ti cu kan duh ciomi a si ko.

Lungthu pakhat a pelh deng ah maw, asiloah, lungthu pakhat kan phelh deng sual ah maw lung dai te le lung sau tein khuaruah rih a hau ko.

Chin mi cu tung thum tonh Lai lungthu bantuk kan si. A ho hmanh bau awk kan ṭha lo.

(Mratt Kyawthu bia i hlan ah cun, hi ca ka ṭialmi hi lungthiang tein ral a tu cuahmahmi kan naule le kan ule nih cun caan heu lengmang in rel a hau lo.)

A Ruang
18/10/2021

Credit: CungthaPa Aruang

Be the first to comment on "By CungthaPa Aruang: Kan Lungthu Le Kan Ramkhel"

Leave a comment

Your email address will not be published.


*