An Phum Ni 4 A Rauh Ah A Pasal Cu Inn Bak A Rak Phan i, A Nupi Cu Tihpah Bu Le Lau Bu Ten Aa Lawmtuk

Honduras Ram, Rl Carmen ah Victoria Sarmiento tiah auh mi Hringtu nu cu ka pasal Julio Sarmiento Kum 65 nih a kan liamtaknak ni 4 a si cang tiah, a pasal Julio zuunngai le lileng ngaihchia mitthli tla in Inn i a um cuahmah lio ah a pasal Julio cu ruahlopin Inn ah a rak phan i, Inn chungah a lut cawlh. Victoria Sarmiento cu a khuaruah a har tuk i, a lau tuk. Ka pasal Julio a thla nih maw a rak kan len hnga tiah tih ngai in a um.

 

 

Thilcanning cu mahtihin a si. Victoria Sarmiento a pasal Julio Sarmiento kum 65 cu a luancia mi Zerh 2 hrawng ah khan El Carmen Khua leng a chuahnak in a tlau mi a si. Julio kum 65 cu a nupi Victoria Sarmiento telh in Innpa chakthlang mipi pawl le Mibawmchantu hna nih an kawl len ko nain, an hmu lo. Cucaahcun 2020 December 30 ah khan Victoria Sarmiento nih a pasal Julio Identity (Hmatpungtin) le a hmanthlak cu Palik Sakhan ah mitlau theihternak a tuah.

 

 

Cu hnu ahcun Palik Sakhan in Meng 30 hrawng a hlatnak Siizung (Hospital de Occidente) ah a ho si theih lomi a thi pa pakhat a ruak a phan. Mah a thi mi pa cu a tlau mi Julio he an kumkhua zong ai thi rual hrawng an si lai tiah an chim. Cucaahcun Victoria Sarmiento nih a thi mi pa a ruak cu a pasal Julio ah a rel, a herh mi paoh tavuan a lak dih i, Honduras Ram phaisa 10500 dih bak in a thi mi pa a ruak cu a pasal vui bak in a vuiter hna.

 

 

Nain, Julio cu ni 4 a rauh hnu ah Inn ah a rak phan than i, Victoria Sarmiento cu a hramthawk ahcun a lautuk i, a tih tuk. Thilsining tthaten a van fian ahcun lawmhnak mitthli a luang ruangmang. Victoria Sarmiento nih mi thi dang ruak pakhat cu a pasal a tlau mi ruak ah a rel i, a pasal ruak vui bak in a vui sual mi a si.

 

 

(Hospital de Occidente) Siizung riantuantu hna nihcun mahtihin an langhter ve. “Victoria Sarmiento nih a pasal ruak vui bantuk in a vui mi pa hi December 27 ah Covid-19 zawtnak hrik in a thi mi a si. A pasal Julio he an hmanthlak pawl zoh ti ahhin an i lo ngai hrim tiah an langhter ve. Nain, Victoria Sarmiento cu a pasal Julio he nungdamten an i tong kho thna i, lawmh a um tuk ko tiah” an langhter ve.

 

Ref: What New 2 Day

 

 

 

Be the first to comment on "An Phum Ni 4 A Rauh Ah A Pasal Cu Inn Bak A Rak Phan i, A Nupi Cu Tihpah Bu Le Lau Bu Ten Aa Lawmtuk"

Leave a comment

Your email address will not be published.


*